Mas malawak na paggamit ng Wikang Filipino sa serbisyo publiko sa Isabela, isinusulong

Isinusulong sa Isabela ang mas malawak na paggamit ng Wikang Filipino sa serbisyo publiko sa pamamagitan ng panlalawigang seminar na naglalayong palakasin ang wastong paggamit nito sa opisyal na komunikasyon ng mga tanggapan ng pamahalaan.

Ang online seminar na pinamagatang “Panlalawigang Seminar sa Korespondensiya Opisyal 2026” ay matagumpay na isinagawa ng Komisyon sa Wikang Filipino (KWF) at Isabela State University – Sentro ng Wika at Kultura (ISU–SWK) nitong Marso 12–13.

Layunin ng aktibidad na maipagpatuloy ang iniaatas na mahusay na implementasyon ng Kautusang Tagapagpaganap Blg. 335, na nagtatakda sa Filipino bilang wika ng serbisyo publiko ng pamahalaan, upang higit pang mapalakas ang pagpapatupad nito.

Kabilang sa mga dumalo sa naturang seminar ang mga kinatawan mula sa Pamahalaang Panlalawigan ng Isabela, iba’t ibang lokal na pamahalaan, Department of the Interior and Local Government (DILG) Isabela, gayundin ang mga kalahok mula sa pribadong sektor.

Kabilang sa mga paksang tinalakay sa seminar ang paggawa ng opisyal na liham, memorandum, at resolusyon upang mapahusay ang kasanayan ng mga kawani sa malinaw at wastong paggamit ng wikang Filipino sa opisyal na komunikasyon.

Binigyang-diin ni Prof. Boyet L. Batang, PhD, Pangulo ng Isabela State University, ang kahalagahan ng wastong korespondensiya sa pagpapalakas ng mahusay na pamamahala at epektibong komunikasyon sa mga institusyon ng pamahalaan.

Ayon sa kaniya, mahalagang kasangkapan ang malinaw at sistematikong pagsulat ng mga opisyal na dokumento upang mapanatili ang integridad, transparency, at propesyonalismo sa serbisyo publiko.

Nagpahayag din ng mensahe si Atty. Marites Barrios-Taran, Tagapangulo ng KWF, kung saan kaniyang tinalakay ang kahalagahan ng paggamit ng wikang Filipino sa mga opisyal na komunikasyon ng pamahalaan.

Nagpaabot ng pasasalamat si Governor Rodito T. Albano sa KWF at ISU sa pag-oorganisa ng seminar upang mapahusay ang paggamit ng wikang Filipino ng mga kawani at mas madaling maunawaan ng mamamayan ang mga komunikasyon ng pamahalaan. – Isabela PIO